Dem can try….Dem can try
But dis natty head, long hair
Leather skin chile
Nah go mek society kneed
Nuh blow job- from gun shot,
Sid dung pon road side life style.
Nah Rub fi look like duppy,
Nah put pon mi head wat is not fi mi.
Self hatred and low self esteem nah do it fi me.
Mi bigga dan dat…Mi betta dan dat
Dis coppa color half chinese catty
Nah go mek nuh random man
Feel up feel up,
Touch up touch up har batty
Yuh MAD?! End up a oman centre?
Fi wat? Beg a likkle fi mek a muckle
Fi mi unborn chile? Fid dat? YUH MAD?!
Weh dem feel like?....Weh mi look like?
Man fi si dis and see Prado, X5 an Range Rover
Not nuh insignificant speck
Weh mongrel dogs a dead over!!!
Dis half chinie a di oman weh mek Tyrus Riley
Sing “she’s royal, so royal”
Suh man must kno dem place
And stay loyal.
Nuh mek mi shining beauty blind yuh,
Mi chop up standard English fool yuh,
Or mi “wana be” Cocoa Bukle shape provoke yuh
Cause unda dis coppa color half chinie ass
A one fullbread WOMAN of class.
One bag a talking
Fi get di Catty walking
Mi nuh bruk man wallet, seh mi a 'service' oman
Mi nuh spread out, or “si dung pon it”.
Mi nuh “fling it up” fi nuh one night stan
Fi Joe Grine and Oral sing “PRAM PRAM”?
Kiss mi nek side, anyting can go suh?
Man start mek pass seh dem can eat yuh like mango?
Mi nuh haffi have a man fi mek me happy
A me a di Wifey inna proverbs terty.
Mi have di cross all ova pon mi
Mi a try fi live di path a Christianity
No comments:
Post a Comment